Euskal Dantzarien Biltzarra
Euskal Dantzarien Biltzarra

Beti Jai Alai dantza taldeak Arriaga Antzokiaren agertokian ospatuko du bere 50 urteko ibilbidea

Egilea: Uriola.eus

Komunikabidea: Uriola.eus

Tokia: Bilbo

Mota: albistea

Data: 2018-11-16

Lotura: Uriola.eus

Ospakizun ekitaldia igande honetan, azaroaren 18an, arratsaldeko 19:00etan, izango da. Beti Jai Alaik omenaldia eskainiko die taldeko kide izan diren guztiei eta, batez ere, taldearen alma materrari, duela denbora gutxi hil den Jon Pertikari. 

Bilboko dantza talde enblematikoenetako batek,Beti Jai Alaitaldeak, bere mende erdiko ibilbidea ospatuko du igande honetan, azaroaren 18an (19:00etan), Arriaga Antzokian eskainiko duen oso emanaldi bereziarekin.  

Duela 50 urte Basurtuko auzoaren sentimendu euskaldunetik sortu zen taldea, gure kulturaren eta tradizioaren benetako erreferente da gaur egun. Eta hori, 1968ko apirilaren 21ean La Casillako Pabiloian lehenengo emanaldia eskaini zuenetik jende aurrean izan dituen emanaldi guztiei esker izan da. Dantzaren eta musikaren bitartez, Beti Jai Alaik euskal kulturarekiko maitasuna transmititu du mota guztietako agertokietan, ekitaldietan, jaietan, erromerietan… Bere bost hamarkadatan taldearen parte izan diren ehunka pertsonei esker izan da hori posible. 

Omenaldia

Beti Jai Alai Arriaga Antzokira itzuliko da, bere urteurrena ospatzeko, taldeko kide izan diren guztiei eta, batez ere, taldearen alma materrari, duela denbora gutxi hil den Jon Pertikari, omenaldia eskainiz. Pasioz betetako eta dantza taldean buru belarri inplikatutako gizonak euskal kulturaren alde egindako lana aintzatestea behar beharrezkoa da. Beti Jai Alaik bere dantza esanguratsuenen erakusketa eskainiko du, ikus-entzunezko medioekin indartutako ikuskizunean. Andoni Arestiren koreografiak izango dira eta, gainera, Kepa Junkerak ere parte hartuko du emanaldian. 

Gaur egun, taldea 150 pertsona inguruk osatzen dute, dantzarien, musikarien, umeen eta kide ohien abesbatzaren artean, eta Euskal Herri osoko dantzak eta melodiak biltzen dituen errepertorio zabala du.